O Concello de Noia, a través da brigada do servizo municipal de Augas, vén de acometer as obras de renovación dun tramo de 140 metros da rede municipal de abastecemento no casco histórico da vila, dando así continuidade aos traballos realizados anteriormente no Malecón de Gasset.

“Para evitarlle molestias á veciñanza, aproveitamos o corte de tráfico polas obras de adecuación da fachada marítima para facer esta actuación que nos permitirá ofrecerlles un mellor servizo aos veciños e veciñas”, explicou o concelleiro de Obras, Martín Fernández Godón.

CONTROL. En varios puntos, coma o da imaxe, colocáronse chaves para recular os cortes en caso de avaría FOTO: C. N.

Os traballos consistiron na instalación dun primeiro tramo de tubaxe de PVC de 160 milímetros de diámetro, que conecta coa zona xa renovada procedente do Malecón de Gasset. A continuación instalouse unha válvula redutora de fundición, pasando a unha tubaxe dun diámetro de 125 milímetros que se mantén en dirección ao Malecón de Cadarso ata chegar ata o cruce coa rúa Porta do Poxilgo. Tamén se melloraron as conexións coas rúas do Forno e Peregrina e se renovaron parte das instalacións eléctricas na zona.

“Estes traballos permitirán ofrecer un mellor servizo aos veciños, xa que este era un tramo moi antigo en rede de fibrocemento e de difícil solución ante posibles avarías, as cales ocasionarían cortes no subministro que afectarían a un sector amplo das rúas do casco histórico”, indica Fernández Godón.

O edil engade que “desta maneira, minimizamos esas molestias en futuros cortes de auga, reducimos considerablemente os sectores que poderían resultar afectados e posibilitamos que o Concello poida abastecer a partir de agora á veciñanza con maior rapidez”.

INCIDENCIAS E MELLORAS
Dúas avarías nun só día

1.- Malecón de Cadarso e rede xeral. Hai dúas semanas, operarios municipais tiveron que arranxar dúas avarías na rede producidas o mesmo día: primeiro, no Malecón de Cadarso e despois, na rede xeral do casco histórico.

2.- Cortes de subministro para a reparación. Para poder levar a cabo as melloras na rede foi preciso realizar un corte no subministro de auga que afectou ás rúas Malecón de Cadarso, Pescadería, Laxe, Forno e Peregrina.

3.- Chaves para regular os cortes. Na actuación levada a cabo instaláronse unhas chaves en determinados puntos para poder regular os cortes de auga en caso de avaría.