El Correo Gallego

Tendencias | tendencias@elcorreogallego.es  |   RSS - Tendencias RSS

O CCG inicia un ciclo de conversas entre profesionais da cultura

Diálogos Confinados é o título do proxecto de entregas audiovisuais que se editan os luns

Web do CCG onde se pode acceder a Diálogos confinados
Web do CCG onde se pode acceder a Diálogos confinados

ECG  | 28.04.2020 
A- A+

Santiago.
Diálogos Confinados é o nome do novo proxecto do Consello da Cultura Galega (CCG) para tomarlle o pulso á cultura galega ante as medidas de illamento social adoptadas para conter a pandemia provocada pola covid-19. Cada luns, diferentes profesionais dos sectores culturais conversarán desde a súa casa moderados por unha persoa que integra algunha das seccións do CCG.

Obterase así unha radiografía real da cultura a partir das súas perspectivas e demandas. Comeza falando de arqueoloxía con María José Bóveda e Francisco Alonso Toucido, guiados por Manuel Gago.

Esta serie de entregas audiovisuais, a modo de pílulas culturais, ten como obxectivo darlle voz á cultura galega nesta situación de parálise. Diferentes persoas dos múltiples ámbitos que abrangue o complexo sector cultural achegarannos as súas percepcións sobre a realidade que están a vivir mediante breves diálogos moderados por persoas vinculadas ao Consello da Cultura Galega. Coñeceremos tamén as súas expectativas de futuro a curto e medio prazo e mais que medidas cren necesario adoptar para paliar os estragos que a parálise está a causar no mundo da cultura. O obxectivo é tecer unha radiografía polifónica da cultura confinada desde Galicia, coas súas perspectivas e demandas para un futuro.

O primeiro diálogo é Arqueoloxía de xestión e servíu para analizar o traballo realizado durante este tempo de parón nas escavacións e que se traduciu en traballo de gabinete, contacto con clientes e divulgación do traballo científico. Constatan que o seu traballo vai sufrir as consecuencias das novas medidas implementadas de distanciamento social tanto nas prospeccións como na divulgación xa que a fenda dixital dificulta o contacto con novos públicos.

En canto ao futuro, coidan que a situación de partida xa é de por si mala porque a arqueoloxía de xestión é un sector pouco capitalizado, pero consideran que hai vías interesantes para explorar como é o das visitas patrimoniais reducidas, máis alá da explotación turística de grandes xacementos.

Desde o inicio do estado de alarma, o CCG manten unha posición activa en diferentes frontes.